السلام عليكم ورحمة الله وبركاته
إن جيت أبيهم أغلقوا دوني الباب
.. .. .. .. .. .. .. ولو طاحت دموع الوله .. مابكوني
ناسٍ أبد ماأعدهم عني أغراب
.. .. .. .. .. .. .. كنت أتولم يمهم .. وإتركوني
في ضيقتي والقلب بالحيل منصاب
.. .. .. .. .. .. .. جيت أتلمس قربهم .. وإخذلوني
والله .. لو ماأعدهم كل الأحباب
.. .. .. .. .. .. .. ولو غيرهم يسكن بغبة عيوني
ماأشره عليهم لو قضا العمر بغياب
.. .. .. .. .. .. .. . ولاتحرك من غلاهم شجوني
أعدهم عن الملا ستر وإحجاب
.. .. .. .. .. .. .. وأبني لهم قصر الغلا .. وإهدموني
أول ليامن جيت بألفين ترحاب
.. .. .. .. .. .. .. وفأجمل محطات الأماني لقوني
واليوم صاروا من ورا ظهري .. أحزاب
.. .. .. .. .. .. .. أحزابهم .. هي ليش ؟؟!! بعد قتلوني
ياويل قلبي .. مابقا فيني عتاب
.. .. .. .. .. .. .. ماباقي إلا دمعتين بعيوني
أخاف لاأذرفها وأنا حولي أجناب
.. .. .. .. .. .. .. تفرحهم دموعي وهدة متوني
والموت يوم الصد .. جاني بلا أسباب
.. .. .. .. .. .. .. كذا .. بليا أسباب راحوا بدوني
إخترت خوتهم على كل الأصحاب
.. .. .. .. .. .. .. وذكرتهم بالخير يومن نسوني
وإستسهلوا بعدي .. وباعوه بأكذاب
.. .. .. .. .. .. .. أحلف لهم بالله .. ماصدقوني
ومن يوم ضاقت .. وإمتلا صدري أتعاب
.. .. .. .. .. .. .. وأبطت تنازف في خفوقي .. طعوني
شلعت أنا وطعوني براس مرقاب
.. .. .. .. .. .. .. وبكيتهم في صمت .. لين .. وحشوني
ياكثر وحشتهم على خافقٍ ذاب
.. .. .. .. .. .. .. وياكثر مافي هالغلا .. كرهوني
وياكثر غيبتهم على قلب مرتاب
.. .. .. .. .. .. .. وياكثر ماضاقت بعد ما جفوني
إن جيت أصد .. وكل ظرفٍ له أنياب
.. .. .. .. .. .. .. وإن جيت ألد لهم .. ملتني غبوني
هم علموني .. ويش هو حرق الأعصاب
.. .. .. .. .. .. .. وفأصعب مواقف رحلتي .. هملوني
وعلى رغم كل المواجع .. فلا خاب
.. .. .. .. .. .. .. ظني بهم لو بالمفارق نووني
وحا بدو .. والله خلقنا من تراب
.. .. .. .. .. .. .. لكّن بدوي بالمكارم .. ملوني
ماحنا بحيالله بدو .. بدوي ذياب
.. .. .. .. .. .. .. ياما وياما لاإعتزيت .. إنصحوني
ولا فيني إلا شي واحد .. وينعاب
.. .. .. .. .. .. .. إنصافي لناس ٍ جفوا وإظلموني
ويوم إلحقوا قلب .. الكرامه .. بمخلاب
.. .. .. .. .. .. .. تهدمت كل القصور بجفوني
ومدام قلب المخلصه صار كذاب
.. .. .. .. .. .. .. وشهوله أرجع .. دامهم .. كذبوني
______________________________________________
منقول
السبت ديسمبر 01, 2007 10:59 am
